Swartland Munisipaliteit het weer hierdie week goeie nuus van die Ouditeur Generaal (OG) ontvang. Die OG het bevestig dat die Swartland Munisipaliteit ‘n 13de skoon oudit behaal het vir die 2024/2025 finansiële jaar!
Burgemeester Cleophas het tydens ‘n spesiale raadsvergadering die aankondiging gemaak. Die Burgemeester het sy dank uitgespreek teenoor die administrasie wat dwarsdeur die jaar hard werk om seker te maak dat alles binne die Swartland geskied volgens die wet en regulasies.
Die term “skoon oudit” beteken ’n ongekwalifiseerde oudit sonder bevindings. Hierdie prestasie is ’n wonderlike manier om 2025 af te sluit.
Wetgewing vereis dat alle munisipaliteite jaarlikse geoudit word. Tydens hierdie proses word finansiële state noukeurig ondersoek om te verseker dat rekenskap van elke transaksie gegee kan word. Oudits gaan verder as net finansies—dit evalueer ook interne prosesse, wat dit ’n omvattende en tydrowende oefening maak. Aan die einde van die oudit bied die ouditspan ’n verslag met hul bevindings aan. Om ’n skoon oudit te behaal, is die beste moontlike resultaat en weerspieël ’n deursigtige en verantwoordbare regering.
Hierdie konsekwente prestasie beklemtoon ons onwrikbare verbintenis tot skoon, verantwoordelike en deursigtige bestuur. Dit bevestig dat Swartland een van die bes bestuurde munisipaliteite in Suid-Afrika is, toegewy aan uitnemendheid en kwaliteit dienslewering vir al ons inwoners.
Hoewel ’n ongekwalifiseerde oudit sonder bevindings (skoon oudit) ’n betekenisvolle prestasie is, beteken dit nie dat dinge foutloos verloop nie. Dit dui egter wel daarop dat die munisipale begroting verantwoordelik gebruik word, in die beste belang van die gemeenskap, eerder as om vermors te word op onpraktiese of onnodige projekte. Swartland bly gefokus op voortdurende verbetering en streef altyd daarna om nog beter dienste aan ons inwoners te lewer.
Graag bedank Swartland Munisipaliteit elke inwoner vir u volgehoue ondersteuning. Die skoon oudit bied aan inwoners die versekering dat die Munisipaliteit se administrasie in goeie hande is met gesonde finansiële bestuur en behoorlike kontroles.
EINDE
