skip to content

Events
October 2014
MoTuWeThFrSaSu
  12345
6789101112
13141516171819
20212223242526
2728293031  

Vacancies

Swartland Munisipaliteit, met sy hoofkantoor op Malmesbury, bedien die dorpe Malmesbury, Yzerfontein, Moorreesburg, Darling, Koringberg, Abbotsdale, Kalbaskraal, Chatsworth, Riverlands, Riebeek-Wes en Riebeek Kasteel.

Die hart van die Swartland bied jou die beste van twee wêrelde. Jy woon en werk in ’n aangename, landelike omgewing waar jy alle moderne geriewe kan geniet. En as jy soms wil wegbreek, is jy skaars 60 km van Kaapstad af en net ’n hanetreetjie van die oorde langs die skilderagtige Weskus.

Die Munisipaliteit beskik tans oor die onderstaande vakatures vir korrek toegeruste en gekwalifiseerde persone:


Departement van die Direkteur: Koporatiewe Dienste
Uitruilstudent na Duitsland
(V11/14) • Salaris: €300 per maand
Munisipaliteit Swartland het 'n samewerkingsooreenkoms met die Sachsen-Anhalt-streek in Oos-Duitsland en, voortspruitend daaruit, bied die Munisipaliteit die geleentheid aan 'n student om (onder sekere voorwaardes) vir een jaar op die Kiezkampus in Duitsland te werk. Kiez is 'n multifunksionele vakansie- en ontspanningsterrein van ongeveer 11 ha in die Harzwoud ‘n paar honderd meter vanaf Guntersberge - met sy ±300 huise die “kleinste stad ter wêreld" - in die Oos-Duitse streek Sachsen-Anhalt en ongeveer 260 km vanaf Berlyn.' Die kampus word deur die jaar benut vir kampe en vakansiegangers en akkommodeer 600 beddens. Daar is 'n konferensielokaal met twee konferensiekamers, vier seminaarkamers, 'n rekenaarkamer, moderne mediategniekstelsel en 'n danslokaal. Die ontspanningsentrum bied verskeie speletjies en avontuur- projekte - swem en watersport in die Bergseerivier gedurende die somermaande en sneeuski in die winter.

Vereistes
• Voornemende aansoekers, wat nie jonger as 18 en ouer as 25 mag wees nie, moet besig wees met hul studie of alreeds 'n kursus voltooi het in een of meer van die volgende: Jeugontwikkeling, Toerisme, Skakelwese, Ekonomiese en Landbou-ontwikkeling • Kandidate moet voorts met gemak in sowel Afrikaans as Engels kan praat en skryf • Indien die kandidaat nie Duits magtig is nie, is dit 'n vereiste om Duits aan te leer • Voorkeur sal gegee word aan kandidate wat vaardig is in MS Word, Excell en Outlook.

Opleiding
Die suksesvolle aansoeker sal vanaf 1 - 31 Januarie 2015 by die Internasionale Skakelkantoor op Malmesbury die nodige opleiding ontvang en wel teen 'n Internskaptoelaag van R75.00 per werksdag.

Algemene Uitgawes
‘n Retoervliegtuigkaartjie (Kaapstad - Duitsland) word ten volle deur die Munisipaliteit betaal, terwyl die student self verantwoordelik is vir die reël van 'n paspoort en visum. Verblyf, mediese dekking en lewensversekering word gratis deur Kiezkampus verskaf. Eie etes moet verskaf word.

Let Wel
Slegs aansoeke van persone wie se ouers permanent binne die Swartland Munisipale Gebied woonagtig is, sal oorweeg word. Geen laat aansoeke sal aanvaar word nie. Voorkeur sal verleen word aan kandidate vanuit die tradisioneel voorheen benadeelde groepe. Die suksesvolle aansoeker moet na afloop van die periode in Duitsland 'n 12 maande terugwerkperiode by die Internasionale skakelkantoor te Malmesbury voltooi

Application forms

 

Volledige besonderhede en die voorgeskrewe aansoekvorms kan gedurende kantoorure telefonies aangevra word by mnr. D. Carolus by 022 487 9400 of op ons webtuiste by www.swartland.org.za Voltooide aansoeke waarop die posverwysingsnommers duidelik aangebring moet word en wat gewaarmerkte afskrifte van kwalifikasies insluit, moet gerig word aan die Menslike Hulpbronafdeling, Privaatsak X52, Malmesbury 7299. Geen aansoeke wat per faks of e-pos aangestuur is, sal vir oorweging in aanmerking kom nie. Aansoeke sluit om 12:00 op Vrydag, 17 Oktober 2014.

Laat of onvolledige aansoeke sal nie oorweeg word nie. Twyfelagtige kwalifikasies of dokumentasie sal ’n aansoeker onmiddellik diskwalifiseer.

Indien ’n aansoeker binne ses weke ná die sluitingsdatum nog geen terugvoering ontvang het nie, kan aangeneem word dat die aansoek onsuksesvol was. Slegs kandidate op die kortlys sal gekontak word. Die Raad behou die reg voor om geen aanstelling te maak nie.

Swartland Munisipaliteit is verbind to Gelyke Indiensneming en onderskryf die beginsels van Regstellende Aksie. Gestremde persone word derhalwe aangemoedig om aansoek te doen.